Manchu/Library/Karafuto Nayoro Documents/No.2/Manchu Script
ᠮᡝᡳ᠌ᡵᡝᠨ ᠊ᡳ ᠵᠠᠩᡤᡳᠨ ᠶᠠᠮᡠᠨ ᠊ᡳ ᠪᡳᡨ᠌ᡥᡝ
ᠮᡝᡳ᠌ᡵᡝᠨ ᠊ᡳ ᠵᠠᠩᡤᡳᠨ ᠶᠠᠮᡠᠨ ᠊ᡳ ᠪᡳᡨ᠌ᡥᡝ᠈ ᡨ᠋ᠣᠣ ᡥᠠᠯᠠ᠈ ᡥᠠᠯᠠᡳ ᡩᠠ ᠣᡵᡴᠣᠪᠰᠣ᠈ ᡤᠠᡧᠠᠨ ᠊ᡳ ᡩᠠ ᡨᡠ᠋ᠰᠣᡴᡠᡵᡩᡝ᠋ᠩᡤᡳ ᠰᡝᡩᡝ᠋ ᠠᠯᡳᠪᡠᡥᠠ᠉ ᡠᠯᡥᡳᠪᡠᠮᡝ ᠰᡝᠯᡤᡳᠶᡝᡵᡝ ᠵᠠᠯᡳᠨ᠈ ᡳᠯᠠᠨ ᠪᡳᠶᠠᡳ ᠵᡠᠸᠠᠨ ᠵᡠᠸᡝ ᡩ᠋ᡝ᠋᠈
ᠵᡳᠶᠠᠩᡤᡳᠶᡡᠨ ᠶᠠᠮᡠᠨ ᠴᡳ ᡠᠩᡤᡳᡥᡝ ᠪᡳᡨ᠌ᡥᡝᡩᡝ᠋᠈ ᠰᠠᡴᡳᠨᡳ ᠰᡝᡵᡝ ᠵᠠᠯᡳᠨ᠈ ᠪᠣᡳ᠌ᡤᠣᠨ ᡶ᠋ᡳᠶᡝᠨ᠋ᡨᡝ᠋ᠨ ᠊ᡳ ᠠᠯᡳᠪᡠᡥᠠᠩᡤᡝ᠈ ᠠᠪᡴᠠᡳ ᠸᡝᡥᡳᠶᡝᡥᡝ ᠊ᡳ ᡩ᠋ᡝ᠋ᡥᡳᠴᡳ ᠠᠨᡳᠶᠠ ᡳᠯᠠᠨ ᠪᡳᠶᠠᡳ ᡳᠴᡝ ᡩ᠋ᡝ᠋ ᠠᠯᡳᠮᡝ ᡤᠠᡳ᠌ᡥᠠ᠈ ᠠᠯᡳᡥᠠ ᠪᡳᡨ᠌ᡥᡝᡳ ᡩᠠ ᡥᡳᠶᠠ ᡴᠠᡩ᠋ᠠᠯᠠᡵᠠ ᡩᠣᡵᡤᡳ ᠠᠮᠪᠠᠨ ᡨ᠋ᠣᠨ᠋ᡩ᠋ᠣ ᠪᠠᡨᡠ᠋ᡵᡠ ᡤᡠᠩ ᠰᡝᡳ ᠵᠠᠰᡳᡥᠠ ᠪᡳᡨ᠌ᡥᡝᡩᡝ᠋᠈ ᠠᠪᡴᠠᡳ ᠸᡝᡥᡳᠶᡝᡥᡝ ᠊ᡳ ᡩ᠋ᡝ᠋ᡥᡳᠴᡳ ᠠᠨᡳᠶᠠ ᠵᡠᠸᡝ ᠪᡳᠶᠠᡳ ᡳᠴᡝ ᠰᡠᠨᠵᠠ ᡩ᠋ᡝ᠋
ᡥᡝᠰᡝ ᠸᠠᠰᡳᠮᠪᡠᡥᠠᠩᡤᡝ᠈ ᠶᠠᠶᠠ ᡤᡝᠮᡠᠨ ᡥᡝᠴᡝᠨ ᡩ᠋ᡝ᠋ ᠵᡳᡥᡝ ᡥᡝᠵᡝ ᡶ᠋ᡳᠶᠠᡴᠠ ᠊ᡳ ᠯᡳᡩ᠋ᠠᡴᠠ᠈ ᠮᠠᠮᠠ ᡝᡵᡧᡝᡵᡝ ᡩ᠋ᡝ᠋ ᠨᡳᠮᡝᠮᡝ ᠠᡴᡡ ᠣᡥᠣ ᠪᡳᠮᡝ᠈ ᠣᠩᡤᠣᠯᠣ ᡳᠨᡠ ᡝᡵᡝ ᡤᡝᠰᡝ ᠪᡳᡥᡝ᠈ ᡝᡵᡝᠪᡝ ᡨᡠ᠋ᠸᠠᠴᡳ ᠴᡝᠨᡳ ᠪᡝᠶᡝ ᡤᡝᠮᡠ ᡝᠰᡥᡠᠨ᠈ ᠴᡝ ᡤᠣᡵᠣ ᠪᡳᠴᡳ ᠠᠯᠪᠠᠨ ᠵᠠᡶᠠᠮᡝ ᠰᠠᡵᡤᠠᠨ ᡤᠠᡳ᠌ᠮᡝ ᡤᡝᠮᡠᠨ ᡥᡝᠴᡝᠨ ᡩ᠋ᡝ᠋ ᠵᡳᡶ᠋ᡳ ᠮᠠᠮᠠ ᡝᡵᡧᡝᡵᡝ ᡩ᠋ᡝ᠋ ᠨᡳᠮᡝᠮᡝ ᠠᡴᡡ ᠣᡥᠣ ᠣᡥᠣᠩᡤᡝ ᡠᠮᡝᠰᡳ ᠵᡳᠯᠠᡴᠠ᠈ ᡝᠰᡝ ᡩᠠ ᠪᠠᠴᡳ ᡤᡝᠮᡠᠨ ᡥᡝᠴᡝᠨ ᡩ᠋ᡝ᠋ ᡳᠰᡳᠨᠵᡳᡵᡝᠩᡤᡝ ᠵᡠᡤᡡᠨ ᡠᠮᡝᠰᡳ ᡤᠣᡵᠣ ᠪᡳᠮᡝ ᡤᡝᠮᡠᠨ ᡥᡝᠴᡝᠨ ᡩ᠋ᡝ᠋ ᡨᡠ᠋᠋ᠸᡝᡵᡳ ᡩ᠋ᡠ᠋ᠪᡝᠰᡳᠯᡝᡵᡝ᠈ ᠨᡳᠶᡝᠩᠨᡳᠶᡝᡵᡳ ᡩᠣᠰᡳᡵᡝ ᠨᡝᡵᡤᡳᠨ᠋ᡩᡝ᠋ ᠮᠠᠮᠠ ᡝᡵᡧᡝᡵᡝᠩᡤᡝ ᠯᠠᠪᡩᡠ᠋᠈ ᠴᡝᠨ᠋ᡩᡝ᠋ ᠯᠠᠪᡩᡠ᠋ ᡨᡠ᠋ᠰᠠ ᠠᡴᡡ᠈ ᡥᠣᠨᠣ ᡝᡵᡳᠨ ᠊ᡳ ᡧᠠᡥᡡᡵᡠᠨ ᠰᡝᡵᡠᡴᡝᠨ ᠪᡝ ᠪᠣᡩ᠋ᠣᠮᡝ ᡝᡵᡩᡝ᠋ᡴᡝᠨ ᠊ᡳ ᠵᡳᠪᡠᡶ᠋ᡳ ᡠᡨ᠌ᡥᠠᡳ ᡥᡡᡩᡠ᠋ᠨ ᡳᠴᡳᡥᡳᠶᠠᡶ᠋ᡳ ᠠᠮᠠᠰᡳ ᡠᠩᡤᡳᠴᡳ ᡨᡝ᠋ᠨᡳ ᠰᠠᡳ᠌ᠨ᠈ ᡝᡵᡝᠪᡝ ᡳᠯᡩᡠ᠋ᠨ ᡩ᠋ᡝ᠋ ᡤᡳᡵᡳᠨ ᡠᠯᠠᡳ ᠵᡳᠶᠠᠩᡤᡳᠶᡡᠨ ᡩ᠋ᡝ᠋ ᠵᠠᠰᡳᡶ᠋ᡳ᠈ ᡝᡵᡝᠴᡳ ᠵᡠᠯᡝᠰᡳ ᡥᡝᠵᡝ ᡶ᠋ᡳᠶᠠᡴᠠ ᠊ᡳ ᡠᡵᠰᡝ ᡤᡝᠮᡠᠨ ᡥᡝᠴᡝᠨ ᡩ᠋ᡝ᠋ ᠵᡳᡶ᠋ᡳ ᠠᠯᠪᠠᠨ ᠵᠠᡶᠠᠮᡝ ᠰᠠᡵᡤᠠᠨ ᡤᠠᡳ᠌ᡴᡳ ᠰᡝᡵᡝᠩᡤᡝ ᠪᡳᠴᡳ᠈ ᡴᡝᠮᡠᠨᡳ ᠨᡝᠨᡝᡥᡝ ᠰᠣᠩᡴᠣᡳ ᠴᡝᠮᠪᡝ ᡥᠣᠨ ᠰᡳᡨ᠋ᠠᠪᡠᡶ᠋ᡳ ᡨᡠ᠋ᠸᡝᡵᡳ ᡝᡵᡳᠨ᠋ᡩᡝ᠋ ᠵᡠᡵᠠᠮᠪᡠᡶ᠋ᡳ ᡤᡝᠮᡠᠨ ᡥᡝᠴᡝᠨ ᡩ᠋ᡝ᠋ ᡠᠩᡤᡳᠴᡳ ᠣᠵᠣᡵᠠᡴᡡ᠈ ᡠᡵᡠᠨᠠᡴᡡ ᠨᠠᡩ᠋ᠠᠨ ᠵᠠᡴᡡᠨ ᡠᠶᡠᠨ ᠪᡳᠶᠠᡳ ᠰᡝᡵᡤᡠᠸᡝᠨ ᡠᠴᡠᡵᡳ ᠪᡝ ᠠᠮᠴᠠᠮᡝ ᠵᡳᠪᡠᡶ᠋ᡳ᠈ ᡥᠠᡵᠠᠩᡤᠠ ᠪᠠᠴᡳ ᡠᡨ᠌ᡥᠠᡳ ᡴᠣᠣᠯᡳ ᠰᠣᠩᡴᠣᡳ ᡳᠨ᠋ᡩᡝ᠋ ᠰᠠᡵᡤᠠᠨ ᡳᠰᡳᠪᡠᠮᡝ ᡳᠴᡳᡥᡳᠶᠠᡶ᠋ᡳ ᡩᠠ ᠪᠠᡩᡝ᠋ ᠠᠮᠠᠰᡳ ᡠᠩᡤᡳᡴᡳᠨᡳ᠈ ᡠᡨ᠌ᡨᡠ᠋ ᠣᡥᠣᡩᡝ᠋᠈ ᠴᡝᠨᡳ ᠪᡝᠶᡝ ᡠᠮᡝᠰᡳ ᡨᡠ᠋ᠰᠠ ᠰᡝᡥᡝᠪᡝ ᡤᡳᠩᡤᡠᠯᡝᠮᡝ ᡩᠠᡥᠠᡶ᠋ᡳ᠈ ᡝᡵᡝᡳ ᠵᠠᠯᡳᠨ ᠵᠠᠰᡳᡥᠠ ᠰᡝᠮᡝ ᡳᠰᡳᠨᠵᡳᡥᠠᠪᡳ᠈ ᡝᡵᡝᠪᡝ ᠨᡳᠩᡤᡠᡨ᠋ᠠ᠈ ᡳᠯᠠᠨ ᡥᠠᠯᠠ ᠮᡝᡳ᠌ᡵᡝᠨ ᠊ᡳ ᠵᠠᠩᡤᡳᠨ ᠰᡝᡳ ᠶᠠᠮᡠᠨ ᡩ᠋ᡝ᠋ ᠪᡳᡨ᠌ᡥᡝ ᠵᠠᠪᡠᠪᡠᡶ᠋ᡳ᠈ ᡠᠯᠠᠮᡝ ᡥᡝᠵᡝ ᡶ᠋ᡳᠶᠠᡴᠠ᠈ ᡴᡠᠶᡝ ᡶ᠋ᡳᠶᠠᡴᠠ ᠊ᡳ ᡠᡵᠰᡝᡩᡝ᠋ ᠰᡝᠯᡤᡳᠶᡝᡶ᠋ᡳ᠈ ᡝᡵᡝᠴᡳ ᠵᡠᠯᡝᠰᡳ ᠵᠠᡶᠠᠨ ᠠᠯᠪᠠᠨ ᠵᠠᡶᠠᠮᡝ ᡤᡝᠮᡠᠨ ᡥᡝᠴᡝᠨ ᡩ᠋ᡝ᠋ ᠰᠠᡵᡤᠠᠨ ᡤᠠᡳ᠌ᠮᡝ ᡤᡝᠨᡝᡵᡝᠩᡤᡝ ᠪᡳᠴᡳ᠈ ᡠᡵᡠᠨᠠᡴᡡ ᠨᠠᡩ᠋ᠠᠨ ᠵᠠᡴᡡᠨ ᠪᡳᠶᠠᡳ ᡩᠣᡵᡤᡳᡩᡝ᠋ ᠰᡝᡵᡤᡠᠸᡝᠨ ᡠᠴᡠᡵᡳ ᠪᡝ ᠠᠮᠴᠠᠮᡝ ᡳᠴᡳᡥᡳᠶᠠᡶ᠋ᡳ ᡠᠩᡤᡳᡴᡳᠨᡳ ᠰᡝᠮᡝ ᠪᡳᡨ᠌ᡥᡝ ᠵᠠᠪᡠᠪᡠᡴᡳ ᠰᡝᠮᠪᡳ ᠰᡝᠮᡝ ᠠᠯᡳᠪᡠᡥᠠᠪᡳ᠈ ᡝᡵᡝᡳ ᠵᠠᠯᡳᠨ ᡠᠩᡤᡳᡥᡝ ᠰᡝᠮᡝ ᡳᠰᡳᠨᠵᡳᡥᠠᠪᡳ᠈ ᡠᡨ᠌ᡨᡠ᠋ ᠣᡶ᠋ᡳ
ᡥᡝᠰᡝ ᠪᡝ ᡩᠠᡥᠠᠮᡝ᠈ ᠰᡠᠸᡝᠨᡳ ᡴᡠᠶᡝ ᡶ᠋ᡳᠶᠠᡴᠠ ᠊ᡳ ᡠᡵᠰᡝ ᡤᡝᠮᡠᠨ ᡥᡝᠴᡝᠨ ᡩ᠋ᡝ᠋ ᠠᠯᠪᠠᠨ ᠵᠠᡶᠠᠮᡝ ᠰᠠᡵᡤᠠᠨ ᡤᠠᡳ᠌ᡴᡳ ᠰᡝᠮᡝ ᡤᡝᠨᡝᡵᡝᠩᡤᡝ ᠪᡳᠴᡳ ᡝᡵᡩᡝ᠋ᡴᡝᠨ ᠊ᡳ ᠵᡳᡶ᠋ᡳ ᠨᠠᡩ᠋ᠠᠨ ᠵᠠᡴᡡᠨ ᡠᠶᡠᠨ ᠪᡳᠶᠠᡳ ᡩᠣᡵᡤᡳᡩᡝ᠋ ᠰᡝᡵᡤᡠᠸᡝᠨ ᠊ᡳ ᡠᠴᡠᡵᡳ ᡤᡝᠮᡠᠨ ᡥᡝᠴᡝᠨ ᡩ᠋ᡝ᠋ ᡳᠰᡳᠨᠠᠮᡝ ᡤᡝᠨᡝᡴᡳᠨᡳ᠈ ᡝᡵᡝᡳ ᠵᠠᠯᡳᠨ ᡠᠯᡥᡳᠪᡠᠮᡝ ᠰᡝᠯᡤᡳᠶᡝᡥᡝ᠉
ᠠᠪᡴᠠᡳ ᠸᡝᡥᡳᠶᡝᡥᡝ ᠊ᡳ ᡩ᠋ᡝ᠋ᡥᡳᠴᡳ ᠠᠨᡳᠶᠠ ᡳᠯᠠᠨ ᠪᡳᠶᠠᡳ ᠣᡵᡳᠨ᠉