Interlingua/Curso de conversation/Capitulo 6, Scenas 5 e 6 (interlingua)

From Wikibooks, open books for an open world
< Interlingua‎ | Curso de conversation
Jump to: navigation, search

SCENA 5: Petro ha retornate a Geneva. Illac ille trova Francesca, qui ha comenciate su travalio. Ille vole saper si illa ha habite problemas in habituar se a su nove travalio. Illa responde que omne va assatis ben ma que omne essera melior post unes altere dies de practica. Illa demanda a Petro si su viage a Frankfurt vadeva ben.

Postea illa vole saper quando ille arrivava a Geneva. Petro tunc vole saper si Catherina es in su officio e si illa es occupate. Francesca dice que illa es libere, e Petro va vider la. Catherina vole saper si le viage a Frankfurt vadeva ben, e Petro narra a illa le detalios sur lor decisiones pro le proxime reunion e sur le programma que illes ha establite.

Francesca tunc les interrumpe con un message urgente e mysteriose. Illa ha recipite in le telex alique que debe esser de grande interesse pro Petro e Catherina.

Francesca: Bon die, senior Minelli.

Petro: Bon die, eh ...

Francesca: Francesca.

Petro: Ah, si. Francesca. Me place multo vider vos. Il pare que vos nunc ha comenciate vostre travalio, e iste loco nunc ha le aer de un ver officio. Como va toto?

Francesca: Multo ben, gratias.

Petro: Vos ha potite installar vos assatis facilemente?

Francesca: Si. Toto ha vadite multo ben. Ma io ha besonio de plus tempore pro adaptar me.

Petro: Naturalmente. Illo prendera unes septimanas.

Francesca: Si.

Petro: Multo ben. Esque vos ha habite ulle problemas usque nunc?

Francesca: No. Nulles.

Petro: Ah, perfecte.

Francesca: E vostre viage a Frankfurt, illo vadeva ben?

Petro: Si, gratias. Excellente.

Francesca: Le bira german vos ha placite?

Petro: No, iste vice io ha bibite plus vino que bira.

Francesca: E quando ha retornate vos a Geneva?

Petro: Oh, iste matino. Dice me, esque Catherina se trova in su officio?

Francesca: Si. Illa es illac.

Petro: Esque vos sape si illa es occupate in iste momento?

Francesca: Eh, no. Illa nunc es sol in su officio. Vos pote entrar.

Petro: Gratias.

Catherina: Bon die, Petro.

Petro: Bon die, Catherina.

Catherina: Vos ha habite un bon viage?

Petro: Si, multo bon, gratias.

Catherina: E como esseva Frankfurt?

Petro: Oh, multo bon. Illo esseva multo agradabile.

Catherina: Nulle problemas?

Petro: No. Nulle problemas.

Catherina: E omne es organisate pro le mense proxime?

Petro: Si. Omne se ha organisate. Illes ha unes ideas multo bon illac. Io ha visitate un ex lor fabricas.

Catherina: Ah, si. Io ha audite que illos es vermente multo bon. Tunc como es le organisation pro le proxime reunion?

Petro: Eh, ben, le commission de liaison es formate. Illo ha quatro membros, que es un bon numero. Un parve commission es multo plus efficace que un grande. Le prime reunion essera hic le tres del mense, o sia lunedi. Illos essera hic pro le hora del jentaculo, e le reunion comenciara postea. Le agenda pro le prime reunion es ...

Catherina: Vos ha un programma?

Petro: Si, certemente. Nos lo ha establite omnes conjunctemente.

Catherina: Multo ben.

Petro: Nos non ha perdite ulle tempore.

Catherina: Tunc, que ha il sur le programma?

Petro: Unes provisiones pro le dece annos proxime, un studio de facibilitate pro un evalutation centralisate.

Catherina: Illo es multo impressionante, omne illo. (Francesca entra.) Si, Francesca?

Francesca: Excusa me pro interrumper vos.

Catherina: Non vos preoccupa vos.

Francesca: Io ha alique que va interessar vos.

Catherina: Ah, si? Que es illo?

Francesco: Lege iste message ex le telex.


EXERCITIO 5: Questiones cortese.

Guida: Io volerea saper lo que ha arrivate sur le telex, naturalmente. Ma intertanto, io volerea audir un altere vice iste questiones de cortesia.

Un homine: Si alicuno retorna de un viage, vos poterea demandar ...

Un femina: Esque vos ha habite un bon viage?

Un homine: Oh, excellente, gratias.

Un altere homine: E si iste persona retorna de London, vos poterea demandar ...

Un femina: Como ha trovate vos London?

Un homine: Multo agradabile, ma un pauco car.

Un femina: Si, le vita illac es car. Io mesme retorna de New York.

Un homine: Como ha trovate vos New York?

Un femina: Interessantissime. Exhauriente, ma fascinante.

Un homine: Vos ha facite unes cosas interessante illac?

Un femina: Si, New York vermente me place multissimo.

Un homine: E etiam a me.

Un femina: Io ha retornate per avion.

Un homine: E le viage, como vadeva illo?

Un femina: Ben. Un pauco longe, naturalmente, e un pauco fatigante.

Un homine: Si, post un tal viage on es sempre multo fatigate.

Un femina: Il es bon retornar al focar.

Un homine: E como va toto?

Un femina: Ah, multo ben. Omne va multo ben. E pro vos, como va toto?

Un homine: Non multo mal, gratias.

Un femina: Ben.

Guida: Bon. Que nos nunc vide lo que il habeva sur le telex.


SCENA 6: Francesca monstra a Petro e Catherina le message sur le telex, que justo ha arrivate ex Cairo. Le egyptianos, il pare, vole construer un citate completemente nove, e le ministro de planification egyptian va arrivar a Geneva le die sequente. Catherina le habeva cognoscite antea quando illes travaliava sur un projecto in Alexandria.

Catherina es assatis confidente que Marex Mundial ganiara le contracto. Naturalmente, Petro anque debera participar in le reunion quando veni le ministro. Petro exprime su confidentia que Marex ganiara le contracto proque Marex potera offerer le melior precios. Lor personal anque es plus competente, e illes fini lor travalio multo rapidemente.

Le telephono sona, e Francesca responde. Il es Alan Tanner, qui invita que Catherina sorti con ille. Ma illa responde firmemente que illa non vole facer isto e que il esserea melio que ille non la telephonava sur cosas personal proque illes non ha ullo plus a discuter.

Petro e Catherina tunc continua lor conversation. Francesca va telephonar le hotel in Geneva ubi le ministro se trova, e illa anque va informar Martijn Ockrente e Olivero Rossi del reunion. Petro mentiona que ille ha audite le conversation de Catherina con Alan Tanner, e ille essaya sympathisar con illa, ma illa non pare anxie o irate de ulle maniera. Petro la invitava a dinar con ille, e ille demanda a illa si ille potera sortir con illa ille vespere.

Francesca: Il ha qualque que vos debe vider.

Catherina: Ah, si? Que?

Francesca: Iste telex. Reguarda.

Petro: Que es illo?

Francesca: Illo veniva de Egypto, de Cairo.

Petro: Que vole illes?

Francesca: Illes construe un nove citate.

Petro: Que?

Francesca: E illes vole construer un rete de transporte pro le citate.

Catherina: Illes vole un studio complete. Toto. Desde le initio.

Petro: De que grandor?

Catherina: Duo centos mille a duo milliones o plus.

Petro: Vos me permitte leger le message?

Catherina: Si, ecce lo.

Francesca: Illo veni de un certe Mohammed Chahine. Ille arriva iste vespere.

Catherina: Ah, si.

Francesca: Ille es le ministro de planification.

Catherina: Si, si.

Francesca: Vos le cognosce?

Catherina: Si. Nos travaliava conjunctemente sur un projecto in Alexandria. Io le cognosceva durante iste travalios.

Francesca: E vos crede que vos obtenera le contracto?

Catherina: Que nos dice que ... io crede que nos poterea ganiar lo, si.

Petro: Illo esserea formidabile! ... Deman matino. Catherina, esque vos vole vider le sol, o esque vos vole que omne nos le vide?

Catherina: Omne nos.

Petro: In ille caso io va lustrar mi scarpas.

Catherina: Ah, si, per favor. Nos debe facer le melior impression possibile.

Petro: E io mesmo portara un camisa munde.

Catherina: De omne manieras, on non pote facer multo in vinti quatro horas.

Petro: No vos preoccupa. Nostre precios es le melior, nos es plus competente, nos pote provider le melior servicio post le construction del projecto, e nos travalia plus rapidemente que nostre competition. Io es confidente que nos ganiara iste contracto.

(Le telephono sona.)

Francesca: Marex Mundial, Geneva. Bon die. Si, senior Tanner, illa es in le officio. Illo es pro vos, Catherina, le senior Tanner.

Catherina: Hello, Alan? No, io non pote. No, io lo regretta, il es vermente impossibile. Vos sape multo ben proque. Ascolta, Alan, le cosas es assi. Accepta los como illos es, e que nos non ha ulle altere conversationes sur illos. No, vermente, io non vole.

Francesca: Esque vos crede que il esserea melior que nos parti?

Petro: No, io vole ascoltar. Illo me interessa.

Catherina: Francamente, Alan, il esserea melio que vos non me telephona pro parlar de iste cosas. Nos essera sempre amicos, collegas, ma illo es toto. No, io vermente non ha ulle altere cosas a dicer. A revider, Alan. (Catherina dirige su attention a Francesca.) Ben. De que parlava nos?

Francesca: Io va contactar le hotel del ministro.

Catherina: Si, multo ben. E postea nos debera notificar Martijn Ockrente e Olivero Rossi que nos ha un reunion deman.

Francesca: Si. Io va monstrar le telex a illes.

Petro: Catherina, ... Io non poteva prevenir me de audir vostre conversation. Io regretta multo que le cosas non vadeva ben inter Alan e vos.

Catherina: Ah, de omne manieras, illo non poteva durar.

Petro: Ma de omne manieras, le nova de un ruptura es sempre un nova mal.

Catherina: No, non vermente.

Petro: Ma mesmo assi, tal rupturas sempre es difficile.

Catherina: Possibilemente si. ... Petro?

Petro: Si?

Catherina: Le altere die, vos me invitava a dinar.

Petro: Si?

Catherina: Eh, ben, ...

Petro: Eh ben que?

Catherina: Eh ben, esque vos ha alique a facer iste vespere?

Petro: Iste vespere?

Guida: Aha! On dicerea que Petro e Catherina nunc va devenir amicos. Il pare que le cosas va vader melio pro illes.