Toki a, jan Jonatan!

The current, editable version of this book is available in Wikibooks, the open-content textbooks collection, at
https://en.wikibooks.org/wiki/Toki_a,_jan_Jonatan!

Permission is granted to copy, distribute, and/or modify this document under the terms of the Creative Commons Attribution-ShareAlike 3.0 License.

lipu lili nanpa wan

lipu lili nanpa wan (1)

tenpo suno nanpa wan (1) pi tenpo mun nanpa luka (5)

mije li awen sewi lon ma tomo. mije li sitelen e lipu pi suno ale. mije li lukin e ma tomo.

mije li awen ala awen sewi lon ma tomo? awen, ona li awen sewi lon ma tomo.

mije li awen ala awen sewi lon...mije? awen ala, ona li awen sewi ala lon mije. ona li awen sewi lon ma tomo.

mije li awen ala awen sewi lon tomo tawa linja? awen ala, ona li awen sewi ala lon tomo tawa linja. ona li awen sewi lon ma tomo. mije li awen sewi lon ma tomo.

mije li sitelen ala sitelen e lipu pi suno ale? sitelen, ona li sitelen e lipu pi suno ale.

lipu pi suno ale li sitelen ala sitelen e mije? sitelen ala, lipu pi suno ale li sitelen ala e mije. lipu pi suno ale li sitelen ala. mije li sitelen. mije li sitelen e lipu pi suno ale.

ma tomo li lukin ala lukin e mije? lukin ala, ma tomo li lukin ala e mije. ma tomo li lukin ala. mije li lukin. mije li lukin ala lukin e ma tomo? lukin, mije li lukin e ma tomo.

mije li awen sewi lon seme? ona li awen sewi lon ma tomo. mije li sitelen e seme? ona li sitelen e lipu pi suno ale. mije li lukin e seme? ona li lukin e ma tomo. ona li awen sewi lon ma tomo, ona li sitelen e lipu pi suno ale, ona li lukin e ma tomo.

mije li awen ala awen sewi lon lipu pi suno ale? awen ala, ona li sitelen lon lipu pi suno ale. mije li lukin ala lukin e mije? lukin ala, ona li lukin ala e mije; ona li lukin e ma tomo.

mije li suli. mije li pona, mije li sona. ona li pilin. ona li pilin e ijo pi ma tomo. ona li pilin: “ma tomo li seme? ma tomo li pona ala pona? ma tomo li suli ala suli?”

mije li sitelen ala sitelen e ma tomo? sitelen ala, ona li sitelen ala e ma tomo; ma tomo li suli. ona li sitelen e lipu pi suno ale; lipu pi suno ale li suli ala.

lipu pi suno ale li pilin ala pilin e ijo mije? pilin ala, lipu pi suno ale li pilin ala. mije li pilin. ona li pilin e ijo lipu pi suno ale, li pilin e ijo pi ma tomo.

ona li sitelen lon lipu pi suno ale. ona li sitelen e ijo pi ma tomo. ona li sitelen: “ma tomo li pona, ma tomo li suli.”

ona li pilin: “ma tomo li pona”; ona li pilin e ni: ma tomo li pona. ona li pilin: “ma tomo li suli”; ona li pilin e ni: ma tomo li suli. ona li pilin e ijo pi ma tomo, ona li pilin e ijo lipu pi suno ale.

lipu pi suno ale li seme? lipu pi suno ale li ni: mije li sitelen lon ona; ona li sitelen lon lipu pi suno ale. lon lipu pi suno ale, mije li sitelen e ijo pi ma tomo. lon lipu pi suno ale, mije li sitelen ala e ijo pi tomo tawa linja; mije li awen sewi lon ma tomo, lon ala tomo tawa linja. ona li pilin ala e ijo pi tomo tawa linja; ona li pilin e ijo pi ma tomo, ma tomo Minsen.

ma tomo li seme? ona li ma tomo Minsen. ma tomo Minsen li lon seme? ona li ni: mije li awen sewi lon ona. mije li lon seme? ona li lon ma tomo Minsen.

pona, ma tomo Minsen li ma tomo suli, li ma tomo pona. mije li pilin e ni: ma tomo Minsen li ma tomo pona, ona li pilin e ni: ona li ma tomo suli. mije li sona. ona li toki: “toki a, ma tomo Minsen!” ona li mije pona!

mije li awen sewi li pilin: “tomo tawa linja li lon seme?” ona li lukin...ona li lukin e tomo tawa linja! ona li pilin: "tomo tawa linja!" tenpo ni la ona li pilin ala e ijo lipu pi suno ale li pilin ala e ijo pi ma tomo; ona li pilin e ijo pi tomo tawa linja!

nasin toki

X ala X

X ala X = ?
- mije li awen sewi lon ma tomo.
- mije li awen ala awen sewi lon ma tomo? awen.
- mije li awen ala awen sewi lon mije? awen ala.

nanpa

wan = 1
- nanpa wan
tu = 2
- nanpa tu
tu wan = 3
- nanpa tu wan
tenpo mun nanpa luka pi tenpo sike nanpa 2019 li tenpo 2019.05.
- tenpo suno nanpa wan pi tenpo mun nanpa luka li tenpo 2019.05.01.
- tenpo suno nanpa tu pi tenpo mun nanpa luka li tenpo 2019.05.02.
- tenpo suno nanpa tu wan pi tenpo mun nanpa luka li tenpo 2019.05.03.

e ijo

mije li pilin e ijo pi ma tomo Minsen.
mije li sitelen e ijo pi ma tomo Minsen.
mije li sitelen: "mi lukin e tomo tawa linja!" ona li sitelen e ijo pi tomo tawa linja.

nimi

ala
awen sewi 🧍
e ijo
e ni:
li
lipu pi suno ale 📝
lon
lon seme 🗺️ 🤷‍♂️
lukin 👀
ma tomo 🏙️
mije 👨🏻
ona
pilin 💭
pona 👍
seme
sitelen 🖋️
sona 🧠
suli
toki 🗣️
toki a 👋
tomo tawa linja 🚂
wan = 1

lipu lili nanpa tu

lipu lili nanpa tu (2)

tenpo suno nanpa tu (2) pi tenpo mun nanpa luka (5)

tenpo ni la mije li lon tomo tawa linja. ona li lon ala ma tomo Minsen; ona li lon tomo tawa linja. ona li tawa. ona li pilin: "tenpo ni la mi tawa tan ma tomo Minsen tawa ma tomo Win. ona li tawa pona. mi olin e tawa."

ona li pilin e ijo pi ma tomo Minsen. ona li pilin: “tenpo ni la mi lon tomo tawa linja, taso tenpo suno pini la mi lon ma tomo Minsen. tenpo ni la mi sitelen e lipu pi suno ale lon tomo tawa linja, taso tenpo suno pini la mi sitelen e lipu pi suno ale lon ma tomo Minsen. tenpo ni la mi pilin lon tomo tawa linja, taso tenpo suno pini la mi pilin lon ma tomo Minsen. tenpo suno pini la mi pilin e ijo pi ma tomo Minsen lon ma tomo Minsen, tenpo ni la mi pilin e ijo pi ma tomo Win lon tomo tawa linja. tenpo ni la mi lon tomo tawa linja, lon ala ma tomo Win. taso mi pilin li sitelen e ijo pi ma tomo Win.”

tenpo ni la mije li pilin ala pilin lon ma tomo Minsen? pilin ala, tenpo ni la ona li pilin ala lon ma tomo Minsen. ona li pilin lon tomo tawa linja. tenpo suno pini la ona li pilin lon ma tomo Minsen. ona li toki: “toki a, tomo tawa linja!”

mije li lon tomo tawa linja, ona li tawa ma tomo. ma tomo li ma tomo Minsen ala; ma tomo Minsen li ma tomo pi tenpo suno pini. ma tomo li ma tomo Win; ma tomo Win li ma tomo pi tenpo suno ni.

mije li pilin e ijo pi ma tomo Minsen ma tomo Win. ona li pilin: “ma tomo Minsen li ma tomo pi tenpo suno pini, ma tomo Minsen li pona. tenpo ni la ona li tenpo suno ni, mi lon tomo tawa linja; tomo tawa linja li pona. ma tomo Win li pona ala pona?”

mije li pilin e ijo pi ma tomo Minsen: ma tomo Minsen li ma tomo pi tenpo suno pini. ona li pilin lon tomo tawa linja: tenpo suno ni la ona li lon tomo tawa linja. ona li pilin e ijo pi ma tomo Win: ma tomo Win li ma tomo pi tenpo suno kama.

ona li pilin: “ma tomo Minsen li suli. tomo tawa linja li suli. ma tomo Win li suli ala suli?”

ona li pilin: “lon ma tomo Minsen, mi sitelen lon lipu pi suno ale. lon tomo tawa linja, mi sitelen lon lipu pi suno ale. lon ma tomo Win, mi sitelen ala sitelen lon lipu pi suno ale? sitelen, tenpo suno kama la lon ma tomo Win, mi sitelen lon lipu pi suno ale. mi olin e lipu pi suno ale.” mije li pilin mute (ona li pilin mute = ona li pilin li pilin li pilin), ona li sitelen mute. pona, ona li mije sona. mije sona li sitelen mute, li pilin mute. ona li jan Jonatan; jan Jonatan li mije sona.

ona li sitelen: “mi jan Jonatan. mi lon tomo tawa linja. tenpo suno pini la mi awen sewi lon ma tomo Minsen; tenpo suno kama la mi awen sewi lon ma tomo Win.”

ona li pilin, li sitelen: “tomo tawa linja...ona li pona, taso majuna. ona li sin ala; ona li majuna. lon ma tomo Minsen, tomo tawa linja li majuna ala majuna? majuna, tomo tawa linja pi ma tomo Minsen li majuna. taso tomo tawa linja pi ma tomo Minsen li pona, mi olin e tomo tawa linja pi ma tomo Minsen. tenpo suno pini la mi olin e tomo tawa linja lon ma tomo Minsen, tenpo suno ni la tenpo ni la mi olin e tomo tawa linja, tenpo suno kama la mi olin e tomo tawa linja lon ma tomo Win. mi olin e tomo tawa linja!”

jan Jonatan li sitelen: "ma tomo Minsen li ma tomo pona li ma tomo majuna, ma tomo Win li ma tomo pona li ma tomo majuna. ma tomo Minsen en ma tomo Win li sin ala, taso li pona. ma tomo Minsen en ma tomo Win li ma tomo majuna, taso pona. ma tomo li sin ala, taso pona. mi olin e ma tomo!"

jan Jonatan li pilin, e ni: tenpo suno tawa nanpa tu li pona. ona li toki: “tenpo suno ni li tenpo suno tawa pona nanpa tu. mi olin e tawa!”

nasin toki

tenpo suno pini, tenpo suno ni, tenpo suno kama

tenpo suno pini = tenpo suno nanpa wan pi tenpo mun nanpa luka (05.01)
tenpo suno ni = tenpo suno nanpa tu pi tenpo mun nanpa luka (05.02)
tenpo suno kama = tenpo suno nanpa tu wan pi tenpo mun nanpa luka (05.03)

tan, tawa

tan ma tomo Minsen tawa ma tomo Win:
- ma tomo Minsen → ma tomo Win
tan ma tomo Win tawa ma tomo Minsen:
- ma tomo Minsen ← ma tomo Win

nimi

majuna
mute
olin
sin
tawa
tenpo ni
tenpo suno kama (tenpo suno pini → tenpo suno ni → tenpo suno kama)
tenpo suno ni (tenpo suno pini → tenpo suno ni → tenpo suno kama)
tenpo suno pini (tenpo suno pini → tenpo suno ni → tenpo suno kama)

lipu lili nanpa tu wan

lipu lili nanpa tu wan (3)

tenpo suno nanpa tu (2) pi tenpo mun nanpa luka (5)

jan Jonatan li awen sewi lon ma tomo Win. jan Jonatan li pilin e ni: ma tomo Win li pona, ma tomo Win li pona lukin. jan Jonatan li pilin ala e ni: ma tomo Win li ike lukin; ona li pilin e ni: ma tomo Win li pona lukin. ona li toki: “ma tomo Win li ma tomo pi pona lukin! mi sitelen e ijo ona!” ona li sitelen e ijo pi ma tomo Win lon lipu pi suno ale. lon lipu pi suno ale, ona li sitelen: “tenpo suno mi nanpa tu wan li pona mute! lon tenpo suno nanpa tu, mi awen sewi lon ma tomo Minsen. taso tenpo ni la mi awen sewi lon ma tomo Win: ma tomo Win li ma tomo Minsen ala. ma tomo Minsen en ma tomo Win li ma tomo tu; ma tomo Minsen li ma tomo Win ala. ma tomo Win li ma tomo Minsen ala. mi awen sewi lon ma tomo Win. ma tomo li pona lukin mute. mi olin e ma tomo Win; ma tomo li ike lukin ala. ma tomo Win li pona lukin a! taso mi jo e ike.”

seme? jan Jonatan li jo ala jo e ike? ike seme? tenpo ni la ona li lukin ala e lipu pi suno ale; ona li lukin e ma tomo li pilin. ona li pilin mute e ijo ike.

ike pi jan Jonatan li ni: ona li olin e ma tomo Win, taso ona li jo ala e tenpo.

ona li pilin: “nnn. tenpo ni ona li tenpo kipisi nanpa luka tu (7). tenpo kipisi nanpa luka luka (10) la tomo tawa linja li weka. tenpo kipisi nanpa luka luka (10) weka tenpo kipisi nanpa luka tu (7) li tenpo kipisi tu wan (3). tenpo kipisi tu wan li tenpo mute ala tawa ma tomo pi pona lukin! mi jo e tenpo ala. jo tenpo li pona, taso mi jo ala e ona! sitelen lipu pi suno ale li pona, taso mi jo ala e tenpo tawa sitelen ona! pali seme lon ma tomo Win?”

ona li pilin: "mi jo ala e tenpo mute. pali seme - sitelen lipu pi suno ale, anu moku, anu lukin pi ma tomo? mi pali e seme?"

ona li pilin mute, li toki: “mi jo e sona pona! tenpo lili la...mi pilin. tomo tawa linja mi li weka lon tenpo kipisi nanpa luka luka (10). tomo tawa linja pi tenpo kama li lon ala lon tenpo kipisi nanpa luka luka wan (11), anu tenpo kipisi nanpa luka luka tu (12), luka luka tu wan (13), luka luka tu tu (14), anu luka luka luka (15)?"

ona li lukin...lon! tomo tawa linja ni li lon: ona li weka lon tenpo kipisi nanpa luka luka luka. tenpo ni la jan Jonatan li pona.

jan Jonatan li toki: “luka luka luka (15) weka luka tu (7) li luka tu wan (8). tenpo ni la mi jo e tenpo kipisi luka tu wan! mi pali e seme?”

ona li toki: “mi sona! mi moku e kipisi soweli. mi moku e telo nasa. tenpo lili la...ala, mi moku e telo nasa tu, anu telo nasa tu wan. sona pona!”

tenpo ni la jan Jonatan li moku e telo nasa lon ma tomo Win, li moku e kipisi soweli. ona li pona. ona li toki: “mi pona a! mi olin e ma tomo Win. mi olin e tawa a!”

nasin toki

pi

jan Jonatan li pilin: tomo tawa linja mi li weka. = tomo tawa linja pi jan Jonatan li weka.
jan Jonatan li sitelen lon lipu pi suno ale. ona li sitelen e ona; ona li lipu pi suno ale pi jan Jonatan.

lon

mije li lon ala lon tomo tawa linja? lon, mije li lon; ona li jan Jonatan.
lipu pi suno ale li lon ala lon kipisi soweli? lon ala, lipu pi suno ale li lon ala kipisi soweli.

tenpo kama

ona li tenpo kipisi nanpa 10. tenpo kama la, ona li tenpo kipisi nanpa 11.
jan Jonatan li lon ma tomo Minsen. tenpo kama la, ona li lon ma tomo Win.
jan Jonatan li pilin: "mi moku." tenpo kama la, ona li moku.

seme

jan Jonatan li olin e tomo tawa linja. jan Jonatan li olin e tomo tawa linja seme? jan Jonatan li olin e tomo tawa linja majuna.
jan Jonatan li lukin e ma tomo. jan Jonatan li lukin e ma tomo seme? jan Jonatan li lukin e ma tomo Win.

ni, ona

jan Jonatan li lon tomo tawa linja majuna. jan Jonatan li olin e tomo tawa linja. tomo tawa linja ni li majuna: jan Jonatan li olin e ona.
jan Jonatan li lukin e ma tomo Win. ma tomo Win li ma tomo. ma tomo ni li ma tomo Win: jan Jonatan li lukin e ona.

a

a = !

tomo tawa linja li majuna mute, mute. jan Jonatan li toki: "tomo tawa linja li majuna a!"
kipisi soweli li pona mute, mute. jan Jonatan li toki: "kipisi soweli li pona a!"
jan Jonatan li jo e ike suli, pi suli mute. jan Jonatan li toki: "ike mi li suli a!"
tomo tawa linja li pona lukin. tomo tawa linja li pona lukin a!
jan Jonatan li sona. ona li sona a!

tenpo kipisi

ona li tenpo kipisi nanpa luka wan: 6:00
ona li tenpo kipisi nanpa tu li tenpo suli luka luka: 2:10

tenpo kipisi = tenpo suli 60. tenpo kipisi wan = tenpo suli 60, tenpo kipisi tu = tenpo suli 120. 6:00 li tenpo kipisi nanpa luka wan. 2:00 li tenpo kipisi nanpa tu. 6:00 weka 2:00 li tenpo kipisi tu tu.

weka

tomo tawa linja li weka tan ma tomo Minsen. tenpo kama la, tomo tawa linja li lon ma tomo Win.
tenpo kipisi kama tu wan la, jan Jonatan li weka.

wan, tu, tu wan...

1: wan
2: tu
3: tu wan
4: tu tu
5: luka
6: luka wan
7: luka tu
8: luka tu wan
9: luka tu tu
10: luka luka
11: luka luka wan
12: luka luka tu...

nimi

a
ike
ike lukin: pona lukin ala
jo
lon
mi
moku
mute
ni
ona
pali
pi
pona
pona lukin
sona
tenpo
tenpo lili: tenpo mute ala
tenpo kama
tenpo kipisi
tenpo suno = tenpo kipisi 24
weka

lipu lili nanpa tu tu

lipu lili nanpa tu tu (4)

jan Jonatan li lon seme? ona li awen ala awen sewi lon ma tomo Win? awen ala, ona li awen sewi lon ma tomo ante. ona li awen sewi lon ma tomo Pisita. ma tomo Pisita li seme? ona li ma tomo lon ma Lomani. tenpo ni la tawa lon ma Lomani li open.

jan Jonatan li sitelen lon lipu ona pi suno ale: “tenpo suno nanpa wan pi tenpo mun nanpa luka la mi lon ma tomo Minsen. tenpo suno nanpa tu pi tenpo mun nanpa luka la mi lon ma tomo Win. tenpo kama la mi lon ma tomo Putape. ma tomo Putape li pona lukin. taso mi jo ala e tenpo lon ma tomo Putape. mi lukin e nasin lon ma tomo Putape. lon ma tomo Putape, mi pilin: lon ni, poka pi pini suno li pini, lon ni, poka pi open suno li open. ma tomo Putape li ante.”

ona li pilin mute lili e ijo pi ma tomo Putape. ona li pilin: “mi jan ni: ona li kama tan ma Inli, tan ma tomo Lantan. mi toki kepeken toki Inli, tan jan lon ma Inli li toki kepeken toki Inli. taso lon ma tomo Putape, mi toki ala tawa jan kepeken toki Inli; mi toki kepeken toki Tosi. toki Tosi mi li pona ala, taso jan lon ma tomo Putape li toki ala kepeken toki Inli. mi mute li toki kepeken toki Tosi. ni li musi: jan lon ma tomo Putape li toki kepeken toki Tosi.”

tenpo ni la jan Jonatan li pilin e ijo pi tawa ona. ona li pilin: “mi lon tomo pi tenpo pini lon ma tomo Lantan. lon tomo pi tenpo pini, kulupu lipu pi ma ante li lon. mi lukin e kulupu lipu. lon tomo pi tenpo pini, lipu ma pi ma ante li lon. mi lukin e lipu ma. kulupu lipu en lipu ma li toki e ni: ma ante li weka, taso musi. lon ma ante, jan mute li lon, jan ante mute.”

tenpo ni la jan Jonatan li pilin mute e ijo pi tawa ona. ona li pilin: “tenpo suno pini la mi lon ma tomo Kunapoka. mi moku lon ma tomo Kunapoka. nimi moku li nimi “paprika hendl”. ona li pona mute, moku lon ma tomo Kunapoka. tomo awen li pona, taso mi lape pona ala. taso ma li pona lukin mute! lon tomo tawa linja, mi lukin e ma tomo lili mute e tomo lawa mute. ma tomo li suli tawa ma tomo lili, taso ma tomo lili li pona lukin mute. tomo lawa li suli tawa tomo awen, li pona lukin tawa tomo awen! ma tomo lili li suli lili tawa ma tomo, taso ona mute li pona lukin, tomo awen li suli lili tawa tomo lawa.”

jan Jonatan li sitelen mute lon lipu ona pi suno ale: “ma tomo Pisita li ma musi. ma tomo Pisita li ma majuna, majuna mute tawa ma ante. kin la tomo awen mi lon ma tomo Pisita li majuna, majuna mute tawa ma tomo ante. lon tomo awen, mi toki e nimi mi: “mi jan Jonatan Aka”. ona mute li toki tawa mi: “kama pona tawa tomo awen.” lon tomo awen, mi lukin e lipu tawa mi. tenpo ni la mi lukin e lipu mi.”

jan Jonatan li lukin e lipu ona. ona li toki:

“jan pona mi. - kama pona. o lape pona. mi lon ma Pukowina, o kama tawa ma Pukowina. tawa tan ma tomo Lantan li pona ala pona? ma mi li pona lukin mute. kama pona tawa ma mi.
jan pona sina, jan Takula.”

jan Jonatan li lukin e lipu li pilin e ijo pi jan pona ona, mije lawa Takula. ona li jan seme? ona li sona ala. taso jan pona ona li musi. kin la ma tomo lili Pisita li musi. jan Jonatan li pona, li pilin e ijo pi jan pona ona. tenpo kama la ona li lape.

nasin toki

mute tawa, lili tawa

mute tawa: >
- jan Jonatan li suli mute tawa lipu pi suno ale. = jan Jonatan > lipu pi suno ale (jan Jonatan li suli, lipu pi suno ale li suli ala)
- moku pi kipisi soweli li pona mute tawa moku ala pi kipisi soweli. = moku pi kipisi soweli > moku ala pi kipisi soweli (moku pi kipisi soweli li pona, moku ala pi kipisi soweli li pona ala)
lili tawa: <
- tomo li suli lili tawa tomo lawa. = tomo < tomo lawa (tomo lawa li suli, tomo li suli ala)
- moku lipu pi suno ale li pona lili tawa moku pi kipisi soweli. = moku lipu pi suno ale < moku pi kipisi soweli (moku pi kipisi soweli li pona; moku lipu pi suno ale li pona ala)

ona

jan Jonatan li lukin e lipu. ona li lipu pi jan Jonatan. ona li lipu ona.
ma tomo li jo e tomo pi tenpo pini. ona li tomo pi tenpo pini pi ma tomo. ona li tomo ona pi tenpo pini.

ona mute

mije wan li ona. mije tu, tu wan, tu tu...li ona mute.
kulupu lipu wan li ona'. kulupu lipu tu, tu wan, tu tu...li ona mute.
mije en kulupu lipu li ona mute.

sina

jan Jonatan li moku e moku. jan li toki: "sina moku. moku sina li pona ala pona?" (sina = jan Jonatan)
jan Jonatan li pilin e ijo pi jan Takula. ona li pilin: "jan Takula, sina li mije pona. ma sina li pona lukin mute."

ante

jan Jonatan li kama tan ma Inli. ona li kama ala tan ma Lomani. ma Lomani li ma ante. (= ma Lomani li ma Inli ala, ona li ma ante).

weka

jan Jonatan li lon tomo tawa linja lon tenpo suno ni, ona li lon tomo tawa linja lon tenpo suno pini, ona li lon tomo tawa linja lon tenpo suno kama. ma Lomani li weka.

toki

kulupu lipu.
o lukin e lipu ma. lon lipu ma, ma tomo Lantan li ma tomo lon ma Inli.
lipu.
jan pona tu.

ante: ≠
jan
jan pona
kama
kama pona
kulupu lipu:
lape
lili: mute ala (1, 2, 3 = lili)
lipu
lipu ma
lon ni
ma
ma tomo lili: ma tomo pi suli ala
mije lawa: mije ni: ona li jo e tomo lawa
nasin
nimi
ona
ona mute
open
poka pi open suno
poka pi pini suno
toki: 💬
toki Inli, ma Inli
toki Tosi, ma Tosi
tomo awen
tomo lawa
tomo pi tenpo pini: tomo suli ni: ona li jo e kulupu lipu majuna e lipu ma majuna
weka

lipu lili nanpa luka

lipu lili nanpa luka (5)

tenpo suno nanpa tu tu (4) pi tenpo mun nanpa luka (5)

tenpo suno ni la jan Jonatan li tawa mije lawa Takula. lon tomo awen, ona li lukin e mije pi tomo awen, li lukin e lipu tan mije lawa Takula lon luka mije pi tomo awen. ona li toki tawa mije pi tomo awen kepeken toki Tosi: "toki a, o pana e lipu tawa mi." mije pi tomo awen li pana e lipu tawa ona.

tenpo kama la ona li toki pi wile sona kepeken toki Tosi: “lipu li seme? jan Takula li sitelen e seme lon lipu?” taso mije pi tomo awen li toki: “mi toki ala kepeken toki Tosi, mi toki ala kepeken toki Tosi.” jan Jonatan li pilin: “nasa! tenpo suno pini la mi toki tawa mije pi tomo awen kepeken toki Tosi, tenpo ni la ona li toki e ni: ona li toki ala kepeken toki Tosi! tan seme?” ona li toki pi wile sona tawa mije pi tomo awen: “sina sona ala sona e ni: mije lawa Takula li jan seme?” taso tenpo ni la mije pi tomo awen li toki ala.

jan Jonatan li pilin: “nasa! mi toki tawa mije pi tomo awen kepeken toki Tosi. ona li wile toki kepeken toki Tosi, taso ona li toki e ni: ona li toki ala kepeken ona! mi wile toki mute pi wile sona tawa ona, taso mi jo ala e tenpo, mi wile weka.”

tenpo ni la jan Jonatan li lon tomo ona lon tomo awen. tenpo kipisi kama la ona li wile weka. taso o lukin! meli majuna li kama tawa tomo ona.

meli majuna: “sina weka tan seme? o weka ala! tenpo suno ni li tenpo suno pona ala! ona li tenpo suno ike, tenpo suno ni: ona li jo e ijo ike!”

jan Jonatan: “mi pona, mi tawa lukin e jan pona. o toki ala e ijo pi ijo ike.”

meli majuna: “sina sona ala sona e ni: tenpo suno ni li tenpo suno pi jan sewi Sose? tenpo kipisi nanpa luka luka tu (12) la ijo ike li kama! sina sona ala sona e ni: sina tawa seme?”

jan Jonatan: “sona ala, sona ala, meli majuna, ijo ale li pona. mi pona, tenpo suno ni la ijo ike li kama ala.”

meli majuna: “o weka ala! o weka ala!”

jan Jonatan: “ala, mi wile weka. o pana ala e telo lukin.”

meli majuna: “linja tu tawa sewi li lon ni. linja tu tawa sewi li tawa sina.”

jan Jonatan: “a... jan Inli li olin ala e linja tu tawa sewi...taso pona. o pana ala e telo lukin.” jan Jonatan li pilin: “lon ma Inli, mi mute li olin e linja tu tawa, taso linja tu tawa sewi ala. lon ma Lomani, jan li olin e linja tu tawa sewi, linja tu tawa ala.”

tenpo ni la meli majuna li tawa. jan Jonatan li taso lon tomo ona. ona li pilin: “ma ni li nasa! meli majuna ni: ona li pana e linja tu tawa sewi! taso mi wile weka.”

nasin toki

tawa

jan Jonatan li lon ma Inli li tawa ma Lomani.
jan Jonatan li toki tawa mije pi tomo awen kepeken toki Tosi, taso mije pi tomo awen li toki e ni: ona li toki ala kepeken toki Tosi.

ijo

ijo:
- mije, tomo awen, linja tu tawa, linja tu tawa sewi, jan Inli, jan sewi...
ijo ala:
- pilin, pana e telo lukin, lon ni, taso, o...
ona mute li jo e wan, tu...: mije wan, tomo awen tu, linja tu tawa sewi wan, jan Inli tu wan, jan sewi... ona mute li ijo.
ona mute li jo ala e wan, tu...: pilin, pana e telo lukin, lon ni, taso, o...ona mute li ijo ala.

mije

mije lon tomo awen li mije pi tomo awen. jan Jonatan li tawa tomo awen li toki tawa mije pi tomo awen.

lon ni

lon ni = o lukin, ona li

meli li lon ni = o lukin, ona li meli.
tomo awen li lon ni = o lukin, ona li tomo awen!

jan, mije, meli

mije = mije ni: ona li kama tan ma.

jan Jonatan li kama tan ma Inli; ona li mije Inli.

tawa meli: meli.

tawa jan (mije, meli, anu sona ala); jan

ijo ale

ijo ale li pona = ijo ike li lon ala (ijo luka luka li lon, ijo luka luka li pona)
ijo ale li ike = ijo pona li lon ala (ijo luka luka luka li lon, ijo luka luka luka li ike)
mi sona e ijo ale = ijo ni li lon ala: mi sona ala e ona

nimi

ijo
ijo ale
ike: pona ↔ ike
jan Inli
jan sewi
linja tu tawa, linja tu tawa sewi
lon ni/lukin
luka
meli: mije ↔ meli
mije pi tomo awen
nasa
o
ona
pana
pana e telo lukin: 😢
pona
sina
tan seme
taso
tawa: tawa ↔ kama
toki pi wile sona
tomo
wile