Novial/Wizard of Oz 2

From Wikibooks, open books for an open world
< Novial
Jump to: navigation, search

Novial home

Kontenaje - Chapitre 1 - Chapitre 2

Chapitre Du
Li Konsilo kun li Munchkines

    La blid vekisa per choko, talim subiti e severi ke si Dorothy non liad sur li moli lite la povud ha bli nosa. Kom esed, li skuso fad la ye halta pokitem spira e ye questiona se quu had eventa; e Toto posid sen koldi, mikri nase en lan fasie e ploretad malim. Dorothy sideskad rekti e observeskad ke li hause non movad; anke non esed sinlumosi, den li sune-brilio inveni tra li fenestre, lumisant li mikri chambre. La saltad fro sur sen lite e kun Toto an sen talones kursed e apertad li porte.

    Li mikri puera kriad surprisat e regardad sirk la, sen okules kreskant plu e plu grandi pro li marvelosi vidatus kel la vidad.

Munchkins.png

    Li siklone had subplasa li hause tre dolsim – relat siklone – mid lande de marvelosi beleso. Esed amindi areas de verdosi gasone an omni flanke, kun majestosi arbres portant richi e saporosi fruktes. Multi belisi flores esed an omni flanke, e fogles kun rari e brilianti plumaje kantad e voletad in li arbres e arbustes. Pokim for esed mikri riverete, torentant e sintiletant inter verdi rives, e sursurant per voise tre gratitudisant a mikri puera kel had lojia talim longitem sur li siki, grisi stepes.

    Durant ke la stead regardant voluntim li stranji e beli vidatus, la observeskad venienti vers la grupe del maxim stranji homes kel la had irgitem unque vida. Les non esed tam grandi kam li kreskat homes kun kel la had sempre es familiari; ma anke les non esed tre mikri. Faktim, les semblad sirk tam alti kam Dorothy, kel esed bonim kreskat puere relat sen aje, quankam les esed, segun lesen aspektos, multi yares plu oldi.

    Tri ek les esed viros e un esed fema, e omnes esed stranjim vestat. Les portat rondi chapeles kel vadad supru a mikri punte ye un pede super lesen kapes, kun mikri kloches sirk li bordes kel klochetad dolsim durant ke les movad. Li chapeles del viros esed blui; li mikri feman chapele esed blanki, e la portad blanki robe kel pendad kom faldes fro lan shultres. Super lu esed arosat mikri astres kel sintileskad in li sune kom diamantes. Li viros esed vestat in blue, del sami kolore kam sen chapeles, e portad bonim polit butes kun profundi rule de blue an li kulmines. Li viros, Dorothy pensad, esed sirk tam oldi kam Onklo Henry, den du ek les haved barbes. Ma li mikri fema esed sinduto multi plu oldi. Lan fasie esed kovrat per sulkes, lasen hares esed preske blanki, e la marchad kelkigrad rigidim.

    Kand disi homes proximeskad li hause vor Dorothy stead in li porte, les pausad e chuchotad a mutu, quasi pavorosi ye veni plusim. Ma li mikri, oldi fema marchad til Dorothy, flekted basim e dikted, kun dolsi voise:

     “Vu es bonvenit, maxim nobli Sorsiera, al lande del munchkines. Nus es talim gratitudosi a vu pro havant tua li Mali Sorsiera del Este, e pro liberisant nusen popule fro sklaviro.”

    Dorothy askoltad disi diktione surprisat. Quu li mikri fema volid dikte per noma la sorsiera, e per dikte ke la had tua li Mali Sorsiera del Este? Dorothy esed inosenti, non-nosiv, mikri puera, kel had bli porta per siklone a multi mailes fro sen heme; e la had nulitem tua ule durant sen toti vivo.

    Ma li mikri fema evidentim expektad lan responso; dunke Dorothy dikted, sin hesito, ”Vu es tre kordial, ma mus es erore. Me non ha tua ule.“

    “Vun hause ha, qualim unque,“ li mikri oldi fema repliked, kun rido, “e tu es li sami kose. Vida!“ la kontinuad, indikant al angule del hause. “Dar es lan du pedes, ankore saliant fro sub bloke de ligne.“

Wizoz feet.png

    Dorothy regardad, e krietad pro timo. Dar, verim, presisim sub li angule del grandi trave sur kel li hause stead, du pedes saliad, shuad in arjenti shues kun puntisat pede-fingres.

     “Ho ve! Ho ve!” Dorothy kriad, tenant sen manus kunu konsternatim. ”Li hause mus ha fala a sur la. Quu nus sal fa?”

”Nulu es faenda”, li mikri fema dikted kalmim.

”Ma que la esed?” Dorothy questionad.

    “La esed li Mali Sorsiera del Este, kom me ha dikte,” li mikri fema responsad. ”La ha tena omni li munchkines in sklaviro durant multi yares, forsant les sklavira por la noktim e jornim. Nun les omni es liberisat, e es gratitudosi a vu pro li favore.”

“Que li munchkines es?“, Dorothy questionad.

“Les es li popule kel habita dis lande del Este vor li Mali Sorsiera regnad.”

“Ob vu es munchkine?” Dorothy questionad.

    “No, ma me es lesen amike, quamkam me habita li lande del Norde. Kand les vidad kel Sorsiera del Este esed morit li munchkines sendad rapidi masajere a me, e me venid instantim. Me es li Sorsiera del Norde.“

“Ho, gratiosi!“ Dorothy kriad. “Ob vu es reali sorsiera?”

     “Yes, verim,“ li mikri fema responsad. “Ma me es bon sorsiera, e li popule ama me. Me non es tam potenti kam esed li Mali Sorsiera kel regnad hir, si talim me self vud ha liberisa li popule.”

“Ma me kredad ke omni sorsieras esed mali,” dikted li puera, kel esed mi-pavorisat fasiant real sorsiera.

    “Ho, no, tu es grandi erore. Esed nur quar sorsieras in omni li Lande de Oz, e du ek las, tas kel lojia in li Norde e li Sude, es bon sorsieras. Me sava ke dis es veri, den me self es un ek las, e non pove erora. Tas kel lojiad in li Este e li Weste esed, ya, mali sorsieras; ma nun pro ke vu ha tua un ek las, es nur un Mali Sorsiera in omni li Lande de Oz – ta kel lojia in li Weste.“

    “Ma,“ Dorothy dikted after penso durant un momente,“Tanta Em ha dikte a me ke omni li sorsieras esed morit – yares e yares ante nun.“

“Que es Tanta Em?“, questionad li mikri oldi fema.

“La es men tanta kel lojia in Kansas, fro vor me venid.”

Wizoz munch.png

    Li Sorsiera del Norde semblad pensa durant kelki tempe, kun sen kape sube e sen okules vers li tere. Tand la regardeskad supru e dikted, ”Me non sava vor Kansas es, den me nulitem ante audid ti lande ye bli mentiona. Ma dikte a me, ob lu es sivilisat lande?”

”Ho, yes,” Dorothy respondad.

    ”Dunke tu explika lu. In sivilisat landes me kreda ke es nuli restanti sorsieras, ni sorsieros, ni magas, ni magos. Ma, komprenda, li Lande de Oz nulitem ha es sivilisat, pro ke nus es separat fro omni li seteri monde. Pro tu nus ankore have sorsieras e sorsieros inter nus.“

“Que es li sorsieros?” Dorothy questionad.

     “Oz self es li Grandi Sorsiero,” li Sorsiera respondad, basifikant sen voise a susuro. “Lo es plu potenti kam omni seteri nus kombinat. Lo lojia in li Urbe de Smeraldes.”

    Dorothy saled questiona altri questione, ma jus tand li munchkines, kel had proximu stea silentiosim, klamad lautim e indikad vers li angule del hause vor li Mali Sorsiera had lia.

    “Quu es?” li mikri oldi fema questionad, e regardad, e komensad rida. Li pedes del morit Sorsiera had totim desaperi, e nulu restad exept li arjenti shues.

    ”La esed talim oldi,” li Sorsiera del Norde explikad, ke la parsikeskad rapidim sub li sune. Tu es li fine de la. Ma li arjente shues es vun, e vu sal have lus por porta.” La moved sen manu subu e prendad supru li shues, e after skusa li polve ek lus donad lus a Dorothy.

     “Li Sorsiera del Este esed fieri ye ti arjenti shues,” un ek li munchkines dikted, “e es kelki sorsio relat lus; ma quu lu es nus nulitem savad.”

Dorothy portad li shues en li hause e plasad lus sur li table. Tand la riveni eku al munchkines e dikted:

     “Me pavoreta e voli retrovada a men tanta e onklo, pro ke me es serti ke les sal pavoreta pri me. Ob vu pove helpa me trova men vie?”

Li munchkines e li Sorsiera regardad mutu, e tand Dorothy, e tand osilifikad sen kapes.

“In li Este, non ferni fro hir,” dikted un, “es grandi desertu, e nule povud vado trans lu e viva.“

“Es sami in li Sude,“ altre dikted, “den me ha es dar e vida lu.“ Li Sude es li lande del quadlinges.“

Dorothy Gale with silver shoes.jpg

    “On ha dikte,“ li triesmi home dikted, "ke es sami in li Weste. E ti lande, vor li Winkies lojia, es regnat dal Mali Sorsiera del Weste, kel vud fa vu sen sklave si vu vada lan vie.“

    “Li Norde es men heme,“ li oldi siniora dikted, "e an sen borde es li sami grandi desertu kel sirkumda disi Lande de Oz. Me regreta, men kara, ke vu sal mus lojia che nus.“

    Dorothy komensad ploreta pro disu, den la sentid solitari inter dis omni stranji homes. Lan lakrimes semblad chagrina li kordial munchkines den les instantim ekprendad sen nase-tukes e komensad plora anke. Pri li mikri oldi fema, la froprendad sen bonete e balansad li punte sur li kulmine de sen nase, durant ke la kontad ”Un, du, tri” kun soleni voise. Instantim li bonete chanjad en plake de ardese, sur kel esed skriptet kom grandi, blanki literes de krete:

”LET DOROTHY VADA AL URBE DE SMERALDES”

    Li mikri oldi fema prendad li plake fro sen nase, e hant lekte li vordes sur lu, questionad, ”Ob vun nome es Dorothy, men kara?”

"Yes," li puere respondad, regardant supru e sikisant sen lakrimes.

"Dunke vu mus vada al Urbe de Smeraldes. Tamen Oz sal helpa vu."

"Vor es li urbe?" Dorothy questionad.

"Lu es exaktim mid li lande, e es regnat da Oz, li Grandi Sorsiero pri kel me ha dikte a vu."

"Ob lo es bon viro?" li puere questionad pavoretosim.

"Lo es bon Sorsiero. Ob lo es viro o non me non pove dikte, den me nulitem ha vida lo."

"Qualim me pove ariva dar?" Dorothy questionad.

"Vu mus marcha. Lu es longi voyaje, tra lande kel es kelkitem plesanti e kelkitem deslumosi e horosiv. Tamen, me sal usa omni magi artes kel me sava por protekte vu."

"Ob vu non sal vada kun me?" pledad li puera, kel had komensa vida li mikri, oldi fema kom sen soli amike.

"No, me non pove fa lu," la respondad, "ma me sal dona a vu men basio, e nule sal osa nosa persone kel ha bli basia dal Sorsiera del Norde."

La proximeskad Dorothy e basiad la dolsim sur li fronte. Vor lan labies tuchad li puera les restisad rondi, briliant marke, kom Dorothy deskovrad bald aftru.

"Li vie al Urbe de Smeraldes es pavat per gelbi brike," li Sorsiera dikted, "dunke vu non pove misa lu. Kand vu sal ariva a Oz non tima lo, ma dikte vun rakonte e prega ke lo helpa vu. Adie, men kara."