Interlingua/Curso de conversation/Capitulo 7, Scenas 5 e 6 (interlingua)

From Wikibooks, open books for an open world
< Interlingua‎ | Curso de conversation
Jump to: navigation, search

SCENA 5: Geneva, in le suite del senior Chahine: Martijn explica a Mohammed le multe avantages del systemas que illes pote offerer a ille. Mohammed vole saper si le parte administrative del projecto consumera multo tempore, ma Catherina le assecura que le quatro de illes pote facer progredir le projecto multo rapidemente. Martijn adde que illes pote seliger inter multe optiones pro arrivar al precios le plus basse.

Mohammed pare imprimite, e ille vole saper quando illes potera producer un offerta detaliate. Catherina estima que illes habera besonio de unes octo a dece septimanas e suggere que illes anque poterea preparar duo o tres projectos alternative. Illa dice que pro facer lor travalio illes habera besonio de certe information, como le costo de combustibile, le natura del systema de electricitate local, e altere simile cosas.

Catherina anque dice a Mohammed que illa e su equipa non vole facer gratis omne iste travalio, e illa essaya persuader le a dicer si finalmente illes recipera le contracto. Mohammed responde que ille ha demandate offertas de tres altere companias e que le probabilitate que Catherina recipera le contracto final es bon ma que ille non pote promitter ullo. Ma a causa de lo que ille ha dicite, Catherina crede que il ha rationes pro optimismo.

Martijn: Iste systema functiona con electricitate. Illo es un systema que on ha probate, e nos sape que illo functiona ben. Naturalmente, illo require multe spatio. Multe spatio.

Mohammed: Illo non es un problema. Nos ha multe spatio in le parcella ubi nos va construer iste citate.

Martijn: Nos ha apprendite multo ex le errores del prime installationes de iste systema in Europa e in Nord America. E vos habera le avantage de lo que nos ha apprendite del problemas que illos nos ha offerite. Vos anque potera planificar vostre rete de transporte al mesme tempore que vos designa le plan del citate mesme. Isto assecura que finalmente vostre systema de transporte essera multo ben integrate con le altere partes de vostre citate e plenara su necessitates de transporte etiam plus efficacemente.

Mohammed: Que typo de systema es illo?

Martijn: Illo es un systema de multo alte technologia. Illo es multo rapide, e multo efficace. Ma, naturalmente, su installation mesme essera assatis car. Illo es magnetic.

Mohammed: E vos pote nos fornir omne iste systemas?

Martijn: Si. Nos pote vos los fornir multo rapidemente. Nos pote usar le servicios de cinque o sex del melior companias del mundo. E naturalmente, nos pote proponer altere solutiones differente.

Mohammed: E esque il habera problemas con demoras admnistrative?

Catherina: Oh, no, de nulle maniera. Como vos pote vider, il ha solmente quatro personas in nostre equipa administrative. Illo tunc es multo mobile e pote facer omne multo rapidemente.

Mohammed: Illo pare esser un multo bon systema.

Martijn: E como nos pote seliger inter multe optiones, nostre precios es multo competitive. Nos cerca le precios le plus avantagiose, e nos passa le beneficios de iste precios basse a nostre clientes.

Mohammed: Bon. Que nos vade nunc al question le plus crucial: Quando potera vos inviar a me un offerta detaliate?

Catherina: Vos dispone de quante tempore?

Mohammed: Inter octo e dece septimanas.

Catherina: Io crede que nos pote hacer le travalios necesse in iste periodo de tempore. Ma nos habera besonio de un idea de vostre budget pro iste projecto.

Mohammed: Naturalmente nos vole fundar iste projecto le plus economicamente possibile. Io non pote dar a vos un quantitate exacte in iste momento.

Catherina: Nos poterea tunc dar a vos un description general de duo o tres solutiones.

Mohammed: Si, illo esserea perfecte.

Catherina: Ben. Pro iste projecto nos anque ha besonio del costos de combustibile, le typo de installation electric que vos ha, e altere simile informationes sur vostre infrastructura.

Mohammed: Multo ben.

Catherina: E, naturalmente, nos anque habera besonio de vostre costos de labor local.

Mohammed: Si. Io jam ha apportate hic ille informtion.

Catherina: Ben. E postea, Mohammed, ...

Mohammed: Si?

Catherina: Francamente, nos non volera facer tante travalio durante octo septimanas gratis.

Mohammed: Si, io comprende.

Catherina: In vostre opinion, esque nos ha un bon probabilitate de obtener iste contracto?

Mohammed: Naturalmente, io non pote dicer a vos si o non in iste momento. Ma io ha demandate que tres companias prepara offertas differente. Io crede que vostre probabilitates es bon. Ma io simplemente non pote vos promitter ullo ante haber vidite voste offertas detaliate.

Catherina: Io comprende, si.

Mohammed: E nos non pote pagar le costos del travalio de preparation de un offerta, si illo es lo que vos me demanda.

Catherina: Io comprende.

Mohammed: Ma inter vos e me, io non pensa que le altere companias pote offerer le servicios que vos nos offere, ma io non pote dar a vos un responsa definite ante vider vostre offertas.

Catherina: Lo que vos ha dicite, naturalmente, io trova assatis incoragiante.


EXERCITIO 5: Discussion de periodos de tempore pro completar projectos.

Guida: Durante le reunion inter Mohammed e le equipa de Catherina, illes ha discutite problemas de periodos de tempore pro completar projectos. Il ha unes expressiones que illes ha usate que pare multo utile.

Un femina: Illes vole un prototypo.

Un homine: Quando? Quando lo vole illes?

Un femina: Le data de limite es le fin de junio.

Un homine: Illo nos lassa quante tempore?

Un femina: Unes sex septimanas.

Un homine: Sex septimanas. Io crede que nos habera besonio de plus que sex septimanas.

Un femina: Quante tempore tunc? Vos habera besonio de quante tempore?

Un homine: Il essera necesse que nos lo fabrica.

Un femina: Quante tempore? Quante tempore essera necesse pro fabricar lo?

Un homine: Duo o tres septimanas. Nos tunc debera assecurar nos que illo functiona ben.

Un femina: Quante tempore essera necesse pro illo?

Un homine: Plus o minus un altere septimana. Tunc nos debera transportar lo.

Un femina: Quante tempore essera necesse pro transportar lo?

Un homine: Oh, duo septimanas, plus o minus.

Un femina: Multo ben. Il essera un question de six septimas pro omne le projecto.

Un homine: Si, ma solmente si omne vade ben. On non pote esser completemente confidente que le projecto essera finite intra six septimanas.

Un femina: Quante tempore, tunc? Quanto tempore crede vos que vos debe reservar pro iste projecto?

Un homine: Io crede que il esserea plus prudente reservar octo septimanas.

Un femina: Octo septimanas. Multo ben. Ma nos debera completar omne iste projecto in octo septimanas sin falta.

Un homine: Io facera omne lo que io pote facer pro assecurar illo.

Guida: Le negotiationes con le senior Chahine ha progredite ben. Io volerea saper si Catherina e le alteres es tan optimiste.


SCENA 6: Geneva, in un automobile e in le offico: Post le reunion con Mohammed, Catherina, Petro, e Martijn discute le possibilitates de obtener le contracto. Catherina es optimistic e crede que si omne depende de Mohammed solmente, illes probabile- mente lo obtenera.

Petro essaya invitar Catherina a dinar con ille, ma illa responde que il esserea melior non facer isto proque Petro probabilemente vadera a Mexico. Petro vole saper si Alan Tanner anque ha habite un certe influentia sur iste decision, e Catherina confessa que isto es ver. De facto, Alan telephona Catherina in le medio de iste conversation, e Catherina dice que illa vole parlar con ille in su officio.

Post isto, Petro decide que ille definitemente vadera a Mexico. Catherina essaya continuar lor conversation post parlar con Alan, ma Petro non coopera, e Catherina es enoiate. Illa tunc vade via con Martijn pro comenciar lor travalio sur le projecto egyptian.

Petro: Catherina, esque vos crede que le reunion vadeva ben?

Catherina: Il me pare que omne vadeva ben.

Petro: Ma usque nunc nos non ha ulle contracto.

Catherina: Si. Vos ha ration. E nos anque non lo habera ante le fin del estate. Ma io crede que nos vermente ha impressionate Mohammed con le qualitate de nostre servicios.

Petro: Illo esseva bon, le prandio.

Catherina: Si. Mohammed es un gourmet.

Petro: Ille pareva multo contente quando nos finiva le reunion.

Catherina: Si. Io pensa que si ille esseva le sol persona que facerea le decision, nos haberea le contracto sin difficultate. Ma mesmo in le circumstantias existente, io crede que nos ha un bon probabilitate de finalmente reciper le contracto.

Petro: Catherina, e pro iste vespere, esque vos crede que il esserea possibile ...

Catherina: Vos parla de sortir a dinar?

Petro: Si, exactemente.

Catherina: Oh no, Petro, que nos non parla plus sur illo.

Petro: Proque non? Esque il es a causa de Alan Tanner?

Catherina: In parte si. Ma il non es solmente a causa de Alan.

Petro: Proque dice vos illo?

Catherina: Eh ben, vos va partir a Mexico, e ...

Petro: Que?

Catherina: Eh ben, le cosas esserea differente si vos restava hic in Geneva. Ma como vos ha decidite vader a Mexico pro travaliar ...

Petro: Ma ...

Martijn: (Entrante in le officio) Ah, como va toto? E le reunion, que pensa vos del possibilitates?

Catherina: Io crede que omne vadeva ben. E vos, Martijn, que crede vos de illo?

Martijn: Oh, io anque lo trovava multo incoragiante, specialmente quando ille diceva a vos "Entre nos, io crede que vostre probabilitates es bon." E le prandio. Illo esseva fantastic.

Petro: Catherina, pro me le cosas ha cambiate.

Catherina: Que ha cambiate?

Petro: Toto.

Martijn: Ah, si? Pro que?

Petro: Vos sape, io voleva quitar Geneva pro vader ...

(Le telephono sona.)

Martijn: Hello? Si, si. Illa es hic. Catherina, illo es pro vos. Le senior Tanner vos telephona.

Catherina: Alan?

Petro: Ma Catherina!

Catherina: Hello, Alan? Si. Io va con vos. Attende un momento. Io es in le officina de reception. Io va vader a mi officio. Io vole parlar con vos illac. Martijn, pote vos connecter Alan con le telephono in mi officio?

Martijn: Hello? Illa nunc es in su officio. Io vos connecte con illa. Remane in le linea. Catherina, vos le ha in le vostre linea.

Petro: Bon. Io nunc sape lo que io va facer.

Martijn: E que es illo?

Petro: Io habeva ration. Geneva non es vermente un bon loco pro me.

Martijn: Vos va a Mexico tunc.

Petro: Si.

Martijn: Si, nos jam credeva illo. Tu jam habeva decidite illo ante un septimana o duo.

Petro: No, non vermente. Pro dicer le veritate, io faceva iste decision solmente ante cinque minutas.

Martijn: Tu jam ha signate le papiros?

Petro: No, ma io va facer lo immediatemente.

Catherina: (Retornante de su officio) Gratias, Martijn.

Petro: Illo non ha durate multe tempore.

Catherina: Que vole vos dicer, Petro?

Petro: A que subjecto?

Catherina: Vos parlava de certe cosas que habeva cambiate.

Petro: No, no. Nullo. Nullo ha cambiate.

Catherina: Petro, vos es vermente le homine le plus exasperante que io unquam ha cognoscite.

Petro: Vos es troppo gentil!

Catherina: Veni con me, Martijn. Que nos comencia nostre travalio sur le offerta.

Martijn: Con placer, chef.

Guida: Il me pare que Petro es troppo fer. Ille pote attraher a se problemas un pauco difficile. Ma a vices veni dies quando nullo se resolve como illo debe resolver se.